Se Wīdfarend

Fram Wicifruma
Gān tō: þurhfōr, sēcan

Oft him ānhaga    āre gebīdeð,
Metudes miltse,    þēah þe he mōdcearig
geond lagulāde    longe sceolde
hreran mid hondum    hrīmcealde sǣ,
wadan wræclāstas.    wyrd bið ful ārǣd!
Swā cwæð eardstapa,    earfeþa gemyndig,
wrāþra wælsleahta,    winemǣga hryre:
'Oft ic sceolde āna    ūhtna gehwylce
mīne ceare cwīþan;    nis nū cwicra nān,
þe ic him mōdsefan    mīnne durre

sweotule āsecgan.    Ic tō sāþe wāt
þæt biþ in eorle    indryhten þeaw,
þæt hē his ferðlocan    fæste binde,
healde his hordcofan,    hycge swā hē wille.
Ne mæg wērig mōd    wyrde wiðstondan,
nē sē hrēo hyge    helpe gefremman:
for ðon dōmgeorne    drēorigne oft
in hyra brēostcofan    bindað fæste.
Swā ic mōdsefan    mīnne sceolde,
oft earmcearig,    ēðle bidǣled,

frēomǣgum feor    feterum sǣlan,
siþþan gēara īu    goldwine mīnne
hrūsan heolster biwrāh,    and ic hēan þonan
wōd wintercearig    ofer waþema gebind,
sōhte sele drēorig    sinces bryttan,
hwǣr ic feor oþþe nēah    findan meahte
þone þe in meoduhealle    minne wisse,
oþþe mec frēondlēasne    frēfran wolde,
wenian mid wynnum.    Wāt sē þe cunnað,
hū slīþen bið    sorg tō geferan

þām þe him lȳt hafað    lēofra geholena:
warað hine wræclāst,    nāles wunden gold,
ferðloca frēorig,    nālæs foldan blǣd;
gemon hē selesecgas    ond sincþege,
hū hine on geoguðe    his goldwine
wenede tō wiste:    wyn eal gedrēas!
For þon wāt sē þe sceal    his winedryhtnes
lēofes lārcwidum    longe forþolian,
ðonne sorg ond slǣp    somod ætgædre
earmne ānhogan    oft gebindað:

þinceð him on mōde    þæt he his mondryhten
clyppe ond cysse,    ond on cnēo lecge
honda ond hēafod,    swā hē hwīlum ǣr
in gēardagum    giefstōlas brēac;
ðonne onwæcneð eft    winelēas guma,
gesihð him biforan    fealwe wǣgas,
baþian brimfuglas,    brǣdan feþra,
hrēosan hrīm and snāw,    hagle gemenged.
þonne bēoð þȳ hefigran    heortan benne,
sāre æfter swǣsne,    sorg bið genīwad,

þonne māga gemynd    mod geondhweorfeð;
greteð glīwstafum,    georne geondscēawað
secga geseldan:    swimmað eft on weg;
flēotendra ferð    nō þǣr fela bringeð
cūðra cwidegiedda;    cearo bið geniwad
þām þe sendan sceal    swīþe geneahhe
ofer waþema gebind    wērigne sefan.
For þon ic geþencan ne mæg    geond þās woruld
for hwan mōdsefa    mīn ne gesweorce,
þonne ic eorla līf    eal geondþence,

hū hī fǣrlīce    flet ofgēafon,
mōdge maguþegnas.    Swā þēs middangeard
ealra dōgra gehwām    drēoseð ond fealleþ;
for þon ne mæg weorþan wīs    wer, ǣr hē āge
wintra dǣl in woruldrīce.    Wita sceal geþyldig,
nē sceal nō tō hātheort    nē tō hrædwyrde,
nē tō wāc wiga    nē to wanhȳdig,
nē tō forht nē tō fægen,    nē tō feohgīfre
nē nǣfre gielpes tō georn,    ǣr hē geare cunne.
Beorn sceal gebīdan,    þonne hē bēot spriceð,

oþ þæt collenferð    cunne gearwe
hwider hreþra gehygd    hweorfan wille.
Ongietan sceal glēaw hæle    hū gæstlīc bið,
þonne ealre þisse worulde wela    wēste stondeð,
swā nū missenlīce    geond þisne middangeard
winde biwāune    weallas stondaþ,
hrīme bihrorene,    hryðge þā ederas.
Wōriað þa wīnsalo,    waldend licgað
drēame bidrorene,    duguþ eal gecrong,
wlonc bī wealle:    sume wīg fornōm,

ferede in forðwege,    sumne fugel oþbær
ofer hēanne holm,    sumne sē hāra wulf
dēaðe gedǣlde,    sumne drēorighlēor
in eorðscræfe    eorl gehȳdde:
ȳþde swā þisne eardgeard    ælda Scyppend
oþ þæt burgwara    breahtma lēase
eald enta geweorc    īdlu stōdon.
Sē þonne þisne wealsteal    wēse geþōhte
ond þis deorce lēf    dēope geondþenceð,
frōd in ferðe,    feor oft gemon

wælsleahta worn,    and þās word ācwið:
‘Hwǣr cwōm mearg? hwǣr cwōm mago?    Hwǣr cwōm māþþumgyfa?
hwǣr cwōm symbla gesetu?    hwǣr sindon seledrēamas?
Ēala beorht bune!    ēalā byrnwiga!
ēala þēodnes þrym!    hū sēo þrāg gewāt,
genāp under nihthelm,    swā hēo nō wǣre!
Stondeð nū on lāste    lēofre duguþe
weal wundrum hēah,    wyrmlīcum fāh:
eorlas fōrnoman    asca þrȳþe,
wǣpen wælgīfru,    wyrd sēo mǣre;

and þās stānhleoþu    stormas cnyssað,
hrīð hrēosende    hrūsan bindeð,
wintres wōma,    þonne won cymeð,
nīpeð nihtscūa,    norþan onsendeð
hrēo hæglfare    hæleþum on andan.
Eall is earfoðlic    eorþan rīce,
onwendeð wyrda gesceaft    weoruld under heofonum.
Hēr bið feoh lǣne,    hēr bið frēond lǣne,
hēr bið mon lǣne,    hēr bið mæg lǣne;

eal þis eorþan gesteal    īdel weorþeð! ’
Swā cwæð snottor on mōde,    gesæt him sundor æt rūne.
Til biþ sē þe his trēowe gehealdeþ,    ne sceal nǣfre his torn tō rycene
beorn of his brēostum ācȳþan,    nemþe hē ǣr þā bōte cunne,
eorl mid elne gefremman.    Wel bið þām þe him āre sēceð,
frofre tō Fæder on heofonum,    þǣr ūs eal sēo fæstnung stondeð.