Brunanburh

Hēr Æðelstān cyning,    eorla drihten,
beorna bēahgifa,    and his brōðor ēac,
Ēadmund æðeling,    ealdorlangne tīr
geslōgon æt sæcce    sweorda ecgum
ymbe Brunanburh:    bordweall clufan,
hēowan heaðolinde    hamora lāfum,
eaforan Ēadweardes,    swā him geæðele wæs
fram cnēomāgum,    ðæt hī æt campe oft
wið laðra gehwæne    land ealgodon,
hord and hāmas.    Hettend crungon

Scotta lēode    and scipflotan,
fǣge fēollan,    feld dennode
secga swāte,    siþþan sunne ūpp
on morgentīd,    mǣre tungol,
glād ofer grundas,    Godes candel beorht,
ēces Drihtnes,    oð sīo æðele gesceaft
sāh to setle.    Ðær læg secg monig
gārum āgēted,    guma Norðerna
ofer scyld scoten,    swylce Scyttisc ēac,
wērig wīges sæd.    Wesseaxe forð

andlangne dæg    ēorodcystum
on lāst legdon    lāðum ðēodum;
hēowan hereflȳman    hindan ðearle
mēcum mylenscearpum.    Myrce ne wyrndon
heardes handplegan    hæleða nānum
ðāra ðe mid Anlāfe    ofer ēargebland
on lides bōsme    land gesōhton,
fǣge tō gefeohte.    Fīfe lāgon
on ðām campstede    cyningas geonge,
sweordum āswefede,    swylce seofene ēac

eorlas Anlāfes,    unrīm herges,
flotena and Scotta.    Ðær geflȳmed wearð
Norðmanna brego,    nēade gebǣded,
tō lides stefne    lȳtle weorode:
crēad cnear on flot,    cyning ūt gewāt
on fealene flōd,    feorh generede.
Swylce ðǣr ēac sē frōda    mid flēame cōm
on his cȳþþe norð,    Costantīnus,
hār hilderinc;    hrēman ne ðorfte
mēca gemānan;    hē wæs his māga sceard,

frēonda gefylled    on folcstede,
beslægen æt sæcce,    and his sunu forlēt
on wælstōwe    wundum forgrunden,
geongne æt gūðe.    Gylpan ne ðorfte
beorn blandenfeax    billgeslihtes,
eald inwidda,    nē Anlāf ðȳ mā
mid heora herelāfum    hlihhan ne ðorftun
ðæt hī beaduweorca    beteran wurdon
on campstede    cumbolgehnāstes,
gārmittinge,    gumena gemōtes,
wǣpemgewrīxles,    ðæs hī on wælfelda
wið Ēadweardes    eaforan plegodon.
Gewiton him þā Norðmenn    nægledcearrum,
drēorig daroða lāf,    on Dinges mere
ofer dēop wæter    Dyflin sēcan,
and eft Īraland,    ǣwiscmōde.

Swylce ðā gebrōðor    bēgen ætsomne,
cyning and æðeling,    cȳþþe sōhton,
Wesseaxena land,    wīges hrēmige.
Lētan him behindan    hrā bryttigan
salowigpādan,    ðone sweartan hræfn,
hyrnednebban,    and ðone hasopādan,
earn æftan hwīt,    ǣses brūcan,
grǣdigne gūðhafoc,    and ðæt grǣge dēor,
wulf on wealda.    Ne wearð wæl māre
on ðȳs īglande    ǣfre gȳta
folces gefylled    beforan ðyssum
sweordes ecgum,    ðæs ðe ūs secgað bēc,
ealde ūðwitan,    siþþan ēastan hider
Engle and Seaxe    ūpp becōmon,
ofer brāde brimu    Brytene sōhton,
wlance wīgsmiðas,    Wēalas ofercōmon,
eorlas ārhwate    eard begēatan.