Dēor

Wēlund him be wurman wræces cunnade,
anhȳdig eorl earfoða drēag,
hæfde him tō gesīþþe sorge ond longaþ,
wintercealde wræce; wēan oft onfond,
siþþan hine Niþhad on nēde legde,
swoncre seonobende on syllan monn.
Þæs oferēode, þisses swā mæg.

Beadohilde ne wæs hyre brōðra dēaþ
on sefan swā sār swā hyre sylfre þing,
þæt hēo gearolīce ongieten hæfde
þæt hēo ēacen wæs; ǣfre ne meahte
þrīste geþencan, hū ymb þæt sceolde.
Þæs oferēode, þisses swā mæg.

Wē þæt Mæþhilde monge gefrugnon
wurdon grundlēase Gēates frīge,
þæt him sēo sorglufu slǣp ealle binom.
Þæs oferēode, þisses swā mæg.

Þēodrīc āhte þrītig wintra
Mǣringa burg; þæt wæs monegum cūþ.
Þæs oferēode, þisses swā mæg.

Wē geāscodan Ēormanrīces
wylfenne geþōht; āhte wīde folc
Gotena rīces. Þæt wæs grim cyning.
Sæt secg monig sorgum gebunden,
wēan on wēnan, wyscte geneahhe
þæt þæs cynerīces ofercumen wǣre.
Þæs oferēode, þisses swā mæg.

Siteþ sorgcearig, sǣlum bidǣled,
on sefan sweorceþ, sylfum þinceþ
þæt sȳ endelēas earfoða dæl.
Mæg þonne geþencan, þæt geond þās woruld
wītig dryhten wendeþ geneahhe,
eorle monegum āre gesceawaþ,
wīslīcne blǣd, sumum wēana dǣl.
Þæt ic bi mē sylfum secgan wille,
þæt ic hwīle wæs Heodeninga scop,
dryhtne dȳre. Mē wæs Dēor noma.
Āhte ic fela wintra folgaþ tilne,
holdne hlāford, oþþæt Heorrenda nū,
lēoþcræftig monn londryht geþāh,
þæt mē eorla hlēo ǣr gesealde.
Þæs oferēode, þisses swā mæg.